صفات کا بیان
*صفات کی اہمیت*
صفات ، صفت کی جمع ہے ، جس طرح بغیر مخرج کے حرف ادا نہیں ہوسکتا اسی طرح بغیرصفات کے حرف مکمل طور پر ادا نہیں ہوسکتا یعنی حرف کی آدائیگی ناقص رھتی ھے ۔ جس طرح حُرُوف کے مخارج الگ الگ ہیں ، اسی طرح ہر حرف میں پائی جانے والی صفات بھی جُدا جُدا ہیں ۔ صفات کے ساتھ حرف کو ادا کرنے سے ایک ہی مخرج کے کئی حُرُوف آپس میں جُدا اور مُمتاز ہوجاتے ہیں ۔
یہ بات ذھن میں رھے کہ جتنا مخارج کو سیکھنا ضروری ھے اتنا ھی صفات کو سیکھنا بھی ضروری ھے اگر آپ نے مخارج تو سیکھ لئے لیکن صفات کو نہیں سیکھا تو پھر بھی آپ قرآن پاک پڑھتے وقت غلطیاں کریں گے سو قرآن پاک کو صحیح پڑھنے کے لئے مخارج کے ساتھ صفات کا سیکھنا بھی ضروری ھے ۔
صفت کا لغوی معنی
صفت کا لغوی معنی ٰ ہے ’’ مَا قَا مَ بِشَیْ ئٍ ‘‘جو کسی شے کے ساتھ قائم ہو ۔
صفت کا اصطلاحی معنی
اصطلاح تجوید میں ’’ صفت ‘‘ حرف کی اس حالت یا کیفیّت کو کہتے ہیں جس سے ایک ہی مخرج کے کئی حُروف آپس میں جُدا اور ممتاز ہوجاتے ہیں ۔ مثلاً حرف کا پُر یا باریک ہونا آواز کا بلند یا پست ہونا ، قوی یا ضعیف ہونا، نرم یا سخت ہونا وغیرہ جیسے ’’ص‘‘ اور’’س‘‘اِن کا مخرج توایک ہے مگر ’’ص‘‘ صفتِ استعلاء اور اطباق کی وجہ سے پُر اور ’’س‘‘ صفتِ استفال اور انفتاح کی وجہ سے باریک پڑھا جاتا ہے ۔
صفات کی اقسام
صفات کی دو قسمیں ہیں :
{۱} صفاتِ لازمہ
{۲} صفاتِ عارضہ ۔
صفاتِ لازمہ کی تعریف
حرف کی وہ صفات جو حرف کے لئے ہروقت ضروری ہوں اور ان کے بغیر حرف ادا نہ ہوسکے یا حرف ناقص ادا ھو ۔ مثلاً ’’ظ‘‘ میں صفتِ استعلاء اور اطباق ادانہ کی جائے توحرف ’’ظ‘‘ادا ہی نہیں ہوگا ۔ حرف کو صفات لازمہ کے ساتھ ادا نہ کرنے سے لحن جلی واقع ہوتی ہے ۔ (
صفاتِ عارضہ کی تعریف
حرف کی وہ صفات جو حرف کے لئے کبھی ہوں اور کبھی نہ ہوں ان کے ادانہ کرنے سے حرف ادا تو ھو جاتا ھے لیکن حرف کی تحسین یعنی خوبصورتی باقی نہیں رہتی ۔ مثلاًرا مفتوحہ کو باریک پڑھنا وغیرہ ۔ یہ صفات آٹھ حُرُوف میں پائی جاتی ہیں جن کا مجموعہ’’ : ’’أو یرملان‘‘ ھے ۔ صفاتِ عارضہ کی غلطی کو ’’ لحنِ خفی ‘‘ کہتے ہیں ۔ لیکن لحنِ خفی کو چھوٹی اور معمولی غلطی سمجھ کر اس سے بچنے کی کوشش نہ کرنا بڑی غلطی ہے۔
صفاتِ لازمہ کی اقسام
صفاتِ لازمہ کی دو قسمیں ہیں :
(1)صفاتِ لازمہ متضادہ (2) صفاتِ لازمہ غیرِ مُتَضادہ
صفاتِ لازمہ مُتَضادہ کی تعریف
صفاتِ لازمہ متضادہ وہ صفات ہیں جو آپس میں ایک دوسرے کی ضد ھوں جیسے ’’ ہمس ‘‘کی ضد’’ جہر ‘‘ اور’’ شدّت ‘ ‘ کی ضد ’’ رخاوت ‘‘ ہے ۔
صفاتِ لازمہ مُتضادہ کی تعداد
صفاتِ لازمہ مُتَضادہ کی کل تعداد دس(10) ہے ۔ جن میں سے پانچ ، پانچ کی ضد ہیں ۔
{1}… ہمس {2} … جہر
{3}…شدّت {4} … رخاوت
{5}… استعلاء {6} … استفال
{7}… اطباق {8} … انفتاح
{9}… اذلاق {10}… اصمات
اب آئیے ھم ھر ایک کی کچھ تفصیل جاننے کی کوشش کرتے ھیں
(1)…ہمس
لغوی معنی
’’پستی ‘‘
اصطلاحی معنی
اصطلاحِ تجوید میں ’’ضعف کی وجہ سے آواز کے پست ہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’ حُرُوفِ مہموسہ‘‘کہتے ہیں اور یہ دس (۱۰) ہیں جن کا مجموعہ ’’فَحَثَّہ شَخْصٌ سَکَتْ ‘‘ ہے ۔
طریقۂ ادائیگی
حُروفِ مہموسہ کو ادا کرتے وقت آواز اُن کے مخرج میں اس قدر ضعف یعنی کمزوری سے ٹھہرتی ہے کہ سانس جاری رہتا ہے اور آواز پست ہو جاتی ہے ۔
(2)…جہر
یہ صفت ہمس کی ضد یعنی مخالف (opposite )ہے
لغوی معنی
بلندی
اصطلاحی معنی
اصطلاحِ تجوید میں ’’ قُوّت کی وجہ سے آواز کے بلند ہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’ حُرُوفِ مجہورہ‘‘ کہتے ہیں ۔ حروف مہموسہ کے علاوہ حروفِ تہجی کے باقی انییس (۱۹) حروف ، حروفِ مجہورہ میں شامل ہیں جن کا مجموعہ یہ ہے ۔
عَظُمَ وَزْنُ قَارٍئٍ ذِىْ غَضٍ جَدٍ طَلَبٍ
طریقۂ ادائیگی
حُرُوفِ مجہورہ کو ادا کرتے وقت آواز اُن کے مخرج میں اس قدر قُوّت سے ٹھہرتی ہے کہ اس کے اثر سے سانس کا جاری ہونا موقوف ہوجاتا ھے اور آواز بلند ہوجاتی ہے ۔
(3) شدت
لغوی معنی
سخت
اصطلاحی معنی
اصطلاحِ تجوید میں ’’ قُوّت کی وجہ سے آواز کے سخت ہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’حُرُوفِ شدیدہ‘‘ کہتے ہیں اور یہ آٹھ (۸) ہیں جن کا مجموعہ’’ أَجِدُ قَطٍ بَکَتْ‘‘ہے ۔
طریقۂ ادائیگی
حُرُوفِ شدیدہ کو ادا کرتے وقت آواز اُن کے مخرج میں اتنی قُوّت سے ٹھہرتی ہے کہ فوراً بند ہوجاتی ہے اورسخت ہوجاتی ہے ۔
(4) رخاوت
یہ صفت’’شدّت ‘‘کی ضد ہے ۔
لغوی معنی
نرمی
اصطلاحی معنی
اصطلاحِ تجوید میں ’’ ضعف کی وجہ سے آواز کے نرم ہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’ حُرُوفِ رخوہ‘‘ کہتے ہیں اور یہ سولہ۱۶ ہیں ۔ جوحُرُوفِ شدیدہ اور حُرُوفِ مُتَوسّطہ کے علاوہ ہیں ۔
طریقۂ ادائیگی
حُرُوفِ رخوہ کو ادا کرتے وقت آواز اُن کے مخرج میں اتنے ضعف سے ٹھہرتی ہے جس کی وجہ سے آواز جاری رہتی ہے اور نرم ہوجاتی ہے ۔
صفتِ توسط
تجوید کے اعتبار سے یہ صفت بھی درآصل ’’ شدّت اور رخاوت کے باب کا ھی ایک حصہ ھے یعنی دونوں کی درمیانی حالت کے ساتھ پڑھنے کو ‘‘ صفتِ توسط کہتے ھیں ۔
لغوی معنی
’’درمیان‘‘
اصطلاحی معنی
اصطلاحِ تجوید میں ’’ شدّت اور رخاوت کی درمیانی حالت کے ساتھ پڑھنے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’ حُرُوفِ مُتَوَسّطِہ‘‘ کہتے ہیں اور یہ پانچ ہیں جن کا مجموعہ’’ لِنْ عُمَرْ ‘‘ ہے ۔
طریقۂ ادائیگی
حُرُوفِ متوسطہ کو ادا کرتے وقت آواز اُن کے مخرج میں نہ تو مکمل بند ہوتی ہے کہ شدّت پیدا ہوجائے اور نہ ہی مکمل جاری رہتی ہے کہ رخاوت پیدا ہوجائے بلکہ اس کی درمیانی حالت رہتی ہے ۔
(5) استعلاء
لغوی معنی
بلندی چاہنا
اصطلاحی معنی
اصطلاحِ تجوید میں ’’ زبا ن کی جڑ کے تالو کی جانب بلند ہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’حُرُوفِ مُسْتَعْلِیَہ‘‘ کہتے ہیں اور یہ سات (۷) ہیں جن کا مجموعہ ’’خُصَّ ضَغْطٍ قِظْ‘‘ہے ۔
طریقۂ ادائیگی
حُرُوفِ مستعلیہ کو ادا کرتے وقت زبان کی جڑ تالو کی جانب بلند ہوتی ہے جس کی وجہ سے یہ حُرُوف پُر پڑھے جاتے ہیں ۔
(6) استفال
یہ صفت’’ استعلاء ‘‘ کی ضد ہے ۔
لغوی معنی
نیچائی چاہنا
اصطلاحی معنی
اصطلاحِ تجویدمیں ’’ زبان کی جڑکے تالو کی جانب بلند نہ ہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’حُرُوفِ مُسْتَفِلَہ‘‘ کہتے ہیں اور یہ بائیس (۲۲ )ہیں جو’’حُرُوفِ مستعلیہ ‘‘کے علاوہ باقی حروف ہیں ۔
طریقۂ ادائیگی
حُروفِ مستفلہ کو ادا کرتے وقت زبان کی جڑ تالو کی جانب بلند نہیں ہوتی بلکہ نیچے رہتی ہے اس لئے یہ حُرُوف باریک پڑھے جاتے ہیں ۔
(7) اطباق
لغوی معنی
مل جانا یا ڈھانپ لینا
اصطلاحی معنی
اصطلاحِ تجوید میں ’’ زبان کے پھیل کر تالو سے مل جانے ‘‘کوکہتے ہیں ۔ جن حُرُوف میں یہ صفت پائی جاتی ہے انہیں ’’حُرُوفِ مُطْبَقہ‘‘ کہتے ہیں اور یہ چار ۴ ہیں جن کا مجموعہ ’’صطظض‘‘ ہے ۔
طریقۂ ادائیگی
حُروفِ مطبقہ کو ادا کرتے وقت زبان تالو سے مل جاتی ہے جس کی وجہ سے یہ حُرُوف بَہُت ہی پُر پڑھے جاتے ہیں ۔
(8) انفتاح
یہ صفت’’ اِطباق‘‘کی ضد ہے ۔
لغوی معنی
جُدا رہنا یا کھلا رہنا
اصطلاحی معنی
اصطلاحِ تجویدمیں ’’زبان کے تالو سے جُدارہنے ‘‘ کوکہتے ہیں ۔ جن حُرُوف میں یہ صفت پائی جاتی ہے انہیں ’’حُرُوفِ مُنفَتِحَہْ‘‘ کہتے ہیں اور یہ پچیس۲۵ ہیں جو حُروفِ مطبقہ کے علاوہ باقی حروف ہیں ۔
طریقۂ ادائیگی
حُرُوفِ منفتحہ کو ادا کرتے وقت زبان تالو سے جُدا رہتی ہے ۔
(9) اذلاق
لغوی معنی
کنارہ
اصطلاحی معنی
اصطلاحِ تجویدمیں ’’ حُرُوف کے ہونٹوں ، دانتوں اور زبان کے کناروں سے پِھسل کربسہولت اداہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’حُرُوفِ مُذلَقَہ‘‘ کہتے ہیں یہ چھ حروف ہیں جن کا مجموعہ ’’فَرَّ مِنْ لُّبٍّ‘‘ہے ۔
طریقۂ ادائیگی
حُرُوفِ مذلقہ اپنے مخارج سے پِھسل کر بسہولت ادا ہوتے ہیں ۔
(10) اِصمات
یہ صفت’’ اِذلاق‘‘ کی ضد ہے ۔
لغوی معنی
روکنا
اصطلاحی معنی
اصطلاحِ تجویدمیں ’’ حُرُوف کے مضبوطی اور جماؤ کے ساتھ اداہونے ‘‘ کو کہتے ہیں ۔ جن حُرُوف میں یہ صفت پائی جاتی ہے انہیں ’’ حُرُوف مُصْمَتَہ‘‘کہتے ہیں اور یہ تیئس۲۳ ہیں جو کہ حُرُوفِ مذلقہ کے علاوہ والے حروف ہیں ۔
طریقۂ ادائیگی
حُرُوفِ مصمتہ اپنے مخارج سے مضبوطی کے ساتھ جم کر ادا ہوتے ہیں ۔
صفاتِ لازمہ مُتضادہ کے حامل حروف کامجموعہ
نمبر شمار حُروف تعداد
۱ حُرُوفِ مہموسہ 10 فَحَثَّہ‘ شَخْصٌ سَکَتْ
۲ حُرُوفِ مجہورہ 19 ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔
۳ حُرُوفِ شدیدہ 8 أَجِدُ قَطٍ بَکَتْ
۴ حُرُوفِ رخوہ 16 ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔
- - حُرُوفِ مُتَوَسّطِہ 5 لِنْ عُمَر
۵ حُرُوفِ مُسْتَعْلِیَہ 7 خُصَّ ضَغْطٍ قِظْ
۶ حُرُوفِ مُسْتَفِلَہ 22 ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔
۷ حُرُوفِ مُطْبَقَہ 4 صطظض
۸ حُرُوفِ مُنْفَتِحَہْ 25 ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔
۹ حُرُوفِ مُذْلَقَہْ 6 فَرَّ مِنْ لُّب
۱۰ حُرُوفِْ مُصْمَتَہْ 23 ۔ ۔ ۔ ۔ ۔ ۔ ۔ ۔ ۔ ۔ ۔
جاری ھے